रोल्पा
नेपाली कांग्रेस रोल्पाका सभापति, पूर्वमन्त्री एवम् संविधानसभा सदस्य अमरसिंह पुनले नेपाली कांग्रेसका केन्द्रीय सदस्य एवम् पूर्वमन्त्री नविन्द्रराज जोशीको निधनप्रती दुख व्यक्त गर्नु भएको छ । पूर्वमन्त्री पुनले सामाजिक संजाल मार्फत जोशीप्रती श्रद्धाञ्जली एवम् शोकाकुल परिवारमा समवेदना प्रकट गर्नु भएको हो ।
जोशीको निधनले कांग्रेसले एक कुशल सङ्गथक र देशले एक विकासप्रेमी नेता गुमाएको पुनले उल्लेख गर्नु भएको छ । फागुन १३ गते मष्तिष्कघातपछि अस्पताल भर्ना भएका नेता जोशीको शुक्रबार निधन भएको परिवार स्रोतले पुष्टि गरेको छ । उनको मष्तिष्कघातको शल्यक्रियापछि नर्भिक अस्पतालमा उपचार भइरहेको थियो । शल्यक्रियापछि पनि अस्पतालमा राखिएका नेता जोशीको अवस्था बिग्रिँदै गएको चिकित्सकहरुले बताएका थिए ।
उनको टाउकोमा जमेको पानी र रगत फाल्न फागुन १४ गते शल्यक्रिया गरिएको थियो ।
जोशीको जन्म २०२० साल पुस २४ गते भएको थियो । काठमाडौं क्षेत्र नं. ८ बाट निर्वाचित नेपाली कांग्रेसका संविधानसभा सदस्य नवीन्द्रराज जोशी काठमाडौं महानगरपालिकाका पूर्व उपमेयर थिए ।
२०३६ सालबाट विद्यार्थी राजनीतिमार्फत राजनीतिमा होमिएका जोशीले नेपाल विद्यार्थी संघको काठमाडौं जिल्ला अध्यक्ष र केन्द्रीय महामन्त्रीको जिम्मेवारी सम्हालेका थिए । प्रजातान्त्रिक आन्दोलनका क्रममा जोशी पटकपटक पक्राउ परि हिरासतमासमेत परेका थिए ।
लोकतान्त्रिक मूल्य-मान्यता र संस्कृतिले नै देशलाई प्रगतिको बाटोमा हिडाउन चाहने जोशीले त्रिभुवन विश्वविद्यालयबाट एमबीए गरेका थिए । कुशल संगठनकर्ता र वक्ताका रूपमा परिचित जोशी सामाजिक हितका कार्यमा विशेष रुचि राख्ने गर्थे । उनी गणेशमान सिंह अध्ययन प्रतिष्ठानका संस्थापक तथा अध्यक्ष थिए ।
जोशीका एक छोरी र श्रीमति छन् ।
