गायिका मेलिना राईले प्रेमी सञ्जीव बराइलीसँग केही समयअघि गरेको इन्गेजमेन्ट तोड्ने निर्णय गर्नुभएको छ ।
आफूहरुबीच वैचारिक मतभेद देखिन थालेपछि इन्गेजमेन्ट तोड्ने निर्णय गरेको उहाँले सामाजिक सञ्जाल फेसबुकमार्फत जानकारी गराउनुभएको हो ।
संगीतकर्मी प्रेमी बराइलीसँग केही महिनाअघि उहाँले इन्गेजमेन्ट गर्नुभएको थियो । फेसबुकमा स्टाटस लेख्दै उहाँले सबै इन्गेजमेन्ट विवाहमा परिणत हुनुपर्छ भन्ने बाध्यकारी नहुने समेत स्पष्ट पार्नुभएको छ ।
‘इन्गेजमेन्ट गर्नु मेरो जीवनको एउटा गम्भीर निर्णय थियो । एउटा परिस्थितिमा हामी दुईबीच भविष्यमा सँगै जीवन बिताउने सोचसहित त्यो निर्णय गरिएको थियो,’ उहाँले लेख्नुभएको छ ।
‘समय छोटो भएपनि जिन्दगीको बारेमा लामो विमर्श भयो । हामीबीच वैचारिक रुपमा स्पष्ट मतभेद देखिन थाल्यो अर्थात् हाम्रो विचारमा मेल खान सकेन,’ उहाँले लेख्नुभएको छ ।
आजकै मितिदेखि इन्गेजमेन्ट तोडिएको सामाजिक सञ्जालबाट सार्वजनिक गर्दै उहाँले शुभचिन्तकमा पर्न गएको असरप्रति क्षमाप्रार्थी रहेको बताउनुभएको छ । भविष्यमा अझ मेहनत गरेर सांगीतिक क्षेत्रबाट देशको सेवा गर्ने उहाँले बताउनुभएको छ ।
गत वैशाख २ गते सञ्जीव र मेलिनाले आफूहरुले इन्गेजमेन्ट गरेको तस्वीर सार्वजनिक गरेका थिए । एरेन्जर तथा गिटारिस्ट सञ्जीवले दुई वर्षअघि नै इन्गेजमेन्ट गर्नुभएको थियो । उनीहरुले यसै वर्ष विवाह गर्ने योजना समेत बनाएका थिए ।
